【率直不代表口沒遮攔】
近年多咗好多sell率直又夠mean嘅KOL
Mean盡政棍、明星、身邊大小事⋯
句句說話都帶住刺，精準地搔到癢處。
但率直唔代表口沒遮攔同尖酸刻薄，
千其唔好用「率真」嚟包裝自己嘅無品格。
曾經有位認識嘅朋友，說話非常尖酸刻薄
會當眾用好討厭嘅語氣話人「你咁肥嘅？」
會喺人前打爛沙盆問到篤，追問人嘅私事
人哋啱啱分咗手就會當眾追問哂前因後果，
人哋拍拖就追問去到第幾壘，好奇心異常旺盛。
而我知道佢一向唔覺得自己係尖酸刻薄、咄咄逼人
佢仲覺得自己係個好caring，主動關心朋友嘅好人
甚至以自己性格率直，說話直接而自豪。
尤其近年唔知點解好似吹起「Mean風」
令好多人分唔清口沒遮攔同有話直說嘅分別
以為講一句「唔好介意我坦白」就可以恣意傷害別人
以為講一句「我個人比較直」就可以唔理人感受
以為夠賤咀夠mean就會贏得別人掌聲。
再重覆一次：
#千其唔好用率直嚟包裝自己嘅無禮
每個人或多或少都會有幾個不堪嘅前度
我有時都會覺得自己以前鍾意嘅人好不堪
會鬧自己發雞盲，會想打巴過去嘅自己
我半夜都會後悔自己為過呢啲人付出咁多
亦會嬲自己當初居然可以為呢啲人愛到要生要死。
我相信好多人都會咁，尤其當你搵到真正愛你嘅人時
自然會後悔自己當日為咗個唔愛自己嘅人痛不欲生。
誰都辛酸過，那個沒有？
但作為一個有教養嘅成年人，
唔公開攻擊愛過嘅人係基本禮儀。
香港原來真係有好多高分弱能人士。
年年考第一、讀過牛津，so what？
教育程度高真係唔代表教養程度高。
四萬蚊一套西裝，都包裝唔到你空盪盪嘅內涵。
建議為自己買番一份腦袋保險，學你話：
「30歲就腦殘，疾病無從預測，一定要早啲check。」
如果鍾意我嘅文字，支持我嘅寫作：
https://www.patreon.com/hkgirlfriend
（Patreon收入會將一半捐出）
IG：@hkgirlfriend
FB：港女友
Search